بعض الكامات تشبه

[الراقي]

خليك ع الأرض ماشى
وأوعى تطلع فوق
ازعق وقول ماشى
واتكلم برضه بذوق
دا أنت ع الأرض ماشى
وبكره تطلع فوق
******​

سافرت مع موجة زرقة فى حضن البحر
حدفتنى فى موجة تانية مالهاش بر
لاقيت نفسى فى دوامة بتجر
لا أنا فيها حزين ولا بتسر
*****​

قلت أعمل حساب للزمن وأوفر
وأحط القرش ع القرش يكتر
يمكن بنت الحلال تقدر تصبر
لما البيت الصغير يكبر
*****​

الدنيا سجن كبير وعجيب
فيه الحبيب فى ضل حبيب
لو غابت فيه يوم الشمس
ما تعرف قريب من غريب
*****​

سجنو الكلمة فى لسانى
قلت ومالو ما أنا المسجون
سلبو العقل من راسى
قلت ومالو ما أنا المجنون
سحبو البذرة من فاسى
قلت ومالو ما أنا المديون
حبيت اتكلم واعقلها واتوكل
مالقيت نفسى إلا وأنا مدفون
*****​

 

[الراقي]

كنا زمان أطفال شاطرين
فى الجد واللعب والحب
ولما كبرنا صبحنا خايبين
فى الحب والصدق مش نافعين
*****​

كلمة الآهـ فى لسانى بتقول آهـ وآهـ
لما تيجى تقول الآهـ آهـ وهى آهـ
ولما تيجى تقول الآهـ وهى مش آهـ
فيحسدوك على حالك ومن قولة آهـ
*****​

خيرونى ما بين الألوان
فاخترت أنا الأسود
قالوا لى ما له الأبيض
قولتلهم بكره يتقبل اسود
قالوا لى طب والعسل
قولتلهم أحلى مافيه الأسود
قالوا لى اتفاءل بالنهار اللى جاى
قولتلهم يا خوفى يتقلب اسود
*****​

كتير سألونى عنى وعنها
قلتلهم هاشيل همى وهمها
جيت أدور على همى
صعب عليه همها
*****
​

حبيتك يا حبيبتى ومش هاقدر أقولك
عشان انتى من سنى وأنا من سِنك
وبكره يجى اللى يشترى ويقدر
ويخطفك من كفى ويبعدنى عنك
*****​

 

[الراقي]

سألتك بتحب .. ما جوبتنيش
طب رد .. أيوه .. مافيش
رسينى .. اسكت وأحب وأعيش
ولا أصد .. وابعد عنك .. ولا جيش
*****
​

تيجى نبتدى صفحة جديدة
ما احنا حياتنا
يا حياتى كلها صفحات
تيجى ننهى صفحة قديمة
ما احنا كتابنا
يا حياتى فيه غلطات
تيجى تهتدى وتكونى شريكة
دا احنا حياتنا
يا حياتى كلها درجات
*****
​

عشت قصة حب وكتبت قصايد
فيها المتهنى والشقى والفريسة والصايد
فيها الشهيد والجبان والضعيف والمارد
الكل فى عذاب والكل جحود كايد
*****
​

البنت دى أحلى بنت أنا شفتها
فى رسمها ووصفها واسمها
البنت دى مش أى بنت عرفتها
البنت دى جوه القلب نبضها
*****​

كل دى أحلام
أحلى م الأحلام
سهلة جداً تحقيقها
بس لما أنام
*****​